अशोक थापा मगर निर्देशित सिनेमा ‘जलाकी’को छायांकन सम्पन्न भएको छ । निर्माण टिमका अनुसार पोखरा इन्टरनेशनल म्युजियममा अन्तिम दृश्य खिच्दै ३९ दिनमा सिनेमाको इन्डक्ल्याप गरिएको हो ।

गत शनिबार पोखरामा गीतको दृश्य छायांकन गरिएको थियो, जहाँ सिनेमाका मुख्य कलाकारलाई प्रस्तुत गरिएको निर्माण पक्षले जनाएको छ । छायांकन सकिएसँगै अहिले पोस्ट-प्रोडक्सनको काम सुरु गरिएको निर्देशक अशोक थापा मगरले बताएका छन् । केही दिनभित्रै सिनेमाको फर्स्टलुक पोस्टर सार्वजनिक गर्दै प्रदर्शन मिति घोषणा गर्ने तयारी समेत भइरहेको छ ।

त्रिकोणात्मक प्रेमकथामा आधारित ‘जलाकी’मा उपासना सिंह ठकुरी मुख्य भूमिकामा छिन् । निर्देशक अशोकसँग उनले ‘खुस्मा’पछि दोस्रो सहकार्य गरेकी हुन् । ‘खुस्मा’बाट उत्कृष्ट अभिनेत्रीको राष्ट्रिय पुरस्कार जितेकी उपासना ‘जलाकी’लाई लिएर पनि उत्साहित देखिएकी छन् ।

सिनेमामा उपासनासँगै सोनम तोप्देन, शिल्पा मास्के, माओत्से गरुङ, बुद्धिमान तामाङ, अस्तित्व भट्टचन, साहारा हाङमा लिम्बु, राजु रेग्मी मगर, उषा खड्की, खड्क बहादुर पुन, लुनिभा तुलाधर, संगीता थापा, भावना मगर र क्याप्टेन विजय लामा लगायत कलाकारहरूको अभिनय रहेको छ । मिस सिक्किम साहारा हाङमा लिम्बुले यही सिनेमाबाट नेपाली फिल्म क्षेत्रमा डेब्यु गरेकी हुन् ।

‘जलाकी’ मगर समुदायको आस्था र सम्झनासँग जोडिएको सांस्कृतिक प्रतीक हो । मायाँ र सम्झनाको प्रतिकका रूपमा बनाइने ढुंगाको स्तम्भलाई ‘जलाकी’ भनिने गरिन्छ । यही सांस्कृतिक भावनालाई केन्द्रमा राखेर निर्माण गरिएको सिनेमाको छायांकन रुकुम, रोल्पा, म्याग्दी, बाग्लुङ र पोखराका विभिन्न क्षेत्रमा गरिएको निर्माण टिमले जनाएको छ ।

एम मिडिया प्रालिको ब्यानरमा निर्माण भएको सिनेमाका निर्मातामा ओम घर्ति मगर, बिर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी रहेका छन् । सिनेमाको डीओपी शैलेन्द्र डी कार्की हुन् भने एसडी योगी र सरित राईको संगीत रहेको छ ।

निर्देशक अशोक थापा मगरको डेब्यु निर्देशन रहेको ‘खुस्मा’को चर्चित गीत ‘रुकुम मैकोट’ले युट्युबमा पाँच महिनामै १० करोड भ्युज पार गर्दै ऐतिहासिक रेकर्ड बनाएको थियो । ‘खुस्मा’ बक्सअफिसमा सफल भएपछि निर्माण टिम ‘जलाकी’लाई लिएर पनि आशावादी देखिएको छ ।