0
Shares
काठमाडौं । आगामी जेठ १५ गते प्रदर्शनमा आउने फिल्म रोल नं १को नयाँ इमोस्नल गीत ‘मेरो लागि तिमी’ सार्वजनिक गरिएको छ। गीतले आमा–बुबा र सन्तानबीचको गहिरो सम्बन्ध, त्याग र संघर्षलाई भावुक ढंगले प्रस्तुत गरेको छ।
गीतमा शब्द, संगीत तथा स्वर प्रशान्त शिवाकोटीको रहेको छ। सार्वजनिक गीतले सन्तानका लागि आमा–बुबा नै भगवान् र मन्दिरसरह हुने भावलाई केन्द्रमा राखेको छ। आफ्ना सपना र भाग्यलाई समेत त्यागेर सन्तानको भविष्यका लागि संघर्ष गर्ने अभिभावकको माया र समर्पण गीतको मुख्य सन्देश बनेको छ।
गीतमार्फत फिल्मले नेपाली ग्रामीण समाजका संघर्षशील र आर्थिक रूपमा कमजोर परिवारको कथा भन्ने संकेत गरेको छ। विशेषगरी सन्तानको खुसी र उज्ज्वल भविष्यका लागि अभिभावकले भोग्ने पीडा र चुनौतीलाई गीतले संवेदनशील रूपमा चित्रण गरेको छ।
सार्वजनिक भिडियोमा फिल्मका मुख्य कलाकारहरूलाई फिचर्ड गरिएको छ भने सिनेमाका विभिन्न दृश्य समावेश गरिएका छन्।
जोन योञ्जनको निर्देशनमा तयार भएको फिल्ममा मुकुन भुसाल, सुशांक मैनाली, रेणु योगी र सिर्जना अधिकारी मुख्य भूमिकामा छन्। बाल कलाकारका रूपमा निर्भिक रेग्मी, रिन्चेन लामा, संयम कटुवाल र सिजल श्रेष्ठ देखिएका छन्।
फिल्मलाई विनोद पौडेल र जान्वी पौडेलले निर्माण गरेका हुन् भने सह–निर्मातामा छत्रमाया गिरी र रमेश चौलागाईं रहेका छन्। फिल्मको कथा तथा पटकथा महेश दवाडीले लेखेका हुन्।
निर्माण टिमका अनुसार फिल्मले अहिलेको शैक्षिक प्रणालीले बालमनोविज्ञानमा पार्ने असर र त्यसले विद्यार्थीको जीवनमा ल्याउने परिवर्तनको कथा प्रस्तुत गर्नेछ।
फिल्मको डीओपी शिवराम श्रेष्ठ हुन्। संगीत प्रशान्त शिवाकोटी, बीजीएम रोहित शाक्य, सम्पादन मदन घिमिरेको रहेको छ।
निर्माता पौडेलका अनुसार रोल नं १ नेपालसँगै विदेशमा पनि एकसाथ प्रदर्शन हुनेछ। फिल्मलाई रिच इन्टरटेन्मेन्ट र जे एम सिनेमाले वितरण गर्दैछन्।
