काठमाडौं । प्रदर्शन मिति नजिकिँदै गर्दा नेपाली फिल्म **‘गौँथली’**ले दर्शकमाझ उल्लेखनीय चर्चा बटुलिरहेको छ। साउन १ गतेदेखि प्रदर्शनमा आउन लागेको फिल्मको ट्रेलर युट्युबमा मुभी सेक्सनतर्फ नम्बर १ ट्रेन्डिङमा पुग्दै ७ लाख ३० हजारभन्दा बढी भ्युज हासिल गरेपछि फिल्मप्रतिको उत्सुकता थप बढेको छ।

ट्रेलरले सामाजिक सन्देश, भावनात्मक कथा र प्रभावशाली अभिनयका कारण दर्शकको ध्यान खिच्न सफल भएको देखिन्छ। सार्वजनिक भएको पाँच दिनमै प्राप्त प्रतिक्रिया हेर्दा फिल्मले प्रदर्शनअघि नै सकारात्मक माहोल बनाउन सफल भएको छ।

फिल्मको ट्रेलरले ग्रामीण परिवेशकी एक प्रतिभाशाली युवती ‘गौँथली’ (सिम्रन खड्का)को शिक्षा हासिल गर्ने सपना र त्यसका लागि उनले भोग्नुपरेका सामाजिक, पारिवारिक तथा सांस्कृतिक अवरोधलाई मार्मिक ढंगले प्रस्तुत गरेको छ।

ट्रेलरको सुरुवातमा पढाइमा अब्बल गौँथलीलाई उनका शिक्षकले ठूलो सपना देखाएको दृश्य छ। तर पारिवारिक दबाबका कारण उनको बालविवाह हुन्छ र त्यसपछि उनको जीवनले अप्रत्याशित मोड लिन्छ।

विवाहपछि गौँथलीको पढाइप्रतिको चाहनालाई परिवार र समाजले कसरी दबाउने प्रयास गर्छ भन्ने दृश्यले दर्शकलाई भावुक बनाउँछ। विशेषगरी पुस्तक जलाइने दृश्यले महिला शिक्षा र परम्परागत सोचबीचको द्वन्द्वलाई सशक्त रूपमा प्रस्तुत गरेको छ।

फिल्ममा अभिनेता अरुण क्षेत्रीले निर्वाह गरेको फरक स्वभावको पात्रले विशेष ध्यान खिचेको छ। सरल र निर्दोष चरित्रमा उनको अभिनयलाई ट्रेलरकै आधारमा प्रशंसा गरिएको छ। त्यस्तै, सिम्रन खड्काले संघर्षशील युवतीको भूमिकामा सशक्त अभिनय प्रस्तुत गरेकी छिन्।

‘छोरीलाई पढाउनुपर्छ’ भन्ने सशक्त सन्देश बोकेको फिल्मले पहाडी ग्रामीण समाजको यथार्थ, महिला शिक्षा, बालविवाह र सामाजिक विभेदजस्ता विषयलाई केन्द्रमा राखेको देखिन्छ। यही कारण ट्रेलरले दर्शकबाट सकारात्मक प्रतिक्रिया पाइरहेको विश्लेषण गरिएको छ।

दुई दशकअघि डा. भोला रिजालले निर्माण गरेको ‘गौँथली’ नेपालको पहिलो **गीति फिल्म (म्युजिकल फिल्म)**का रूपमा परिचित थियो। अहिले सोही नाममा उनका छोरा डा. कपिल रिजालले नयाँ पुस्ताका लागि फरक कथा र प्रस्तुतिसहित फिल्म निर्देशन गरेका हुन्।

भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको फिल्ममा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ। बाल कलाकारका रूपमा अंशु ओली र प्रिन्स नेपाली देखिएका छन्।

फिल्मको कथा डा. भोला रिजालको हो भने पटकथा तथा संवाद निर्देशक डा. कपिल रिजाल, निश्चल कुँवर, निरज नेपाल र गिरिराज घिमिरेले संयुक्त रूपमा तयार गरेका छन्। छायांकन हरि हुमागाईं, सम्पादन मिलन श्रेष्ठ, ध्वनि मिश्रण मुकेश शाह, रङ संयोजन राजेन्द्र मोक्तान तथा कोरियोग्राफी रामजी लामिछाने र मौसम हिमालीको रहेको छ।