काठमाडौं । अभिनेत्री प्रियंका कार्कीको अभिनय तथा निर्माण रहेको नेपाली फिल्म **‘मास्टर्नी’**को टिजर सार्वजनिक गरिएको छ। आइतबार सार्वजनिक गरिएको १ मिनेट लामो टिजरले फिल्मको भावनात्मक र रहस्यमय कथावस्तुको झलक प्रस्तुत गरेको छ।

टिजरले आफ्नी छोरीको सुरक्षाका लागि संघर्षरत एउटी आमाको कथा केन्द्रमा रहेको संकेत गर्छ। फिल्ममा प्रियंकाले आमाको मुख्य भूमिका निर्वाह गरेकी छन्।

टिजरको सुरुवात जंगलमा एक महिलाको हत्या भएको दृश्यबाट हुन्छ। त्यसपछि प्रियंकाको भ्वाइसओभर सुनिन्छ, जहाँ उनले आफ्नो जीवनभन्दा पनि छोरीको सुरक्षा महत्वपूर्ण रहेको भाव व्यक्त गरेकी छन्। त्यसपछिका दृश्यहरूमा आमा–छोरीबीचको भावनात्मक सम्बन्ध, प्रहरी अनुसन्धान, एसिड आक्रमण तथा रहस्यमय घटनाक्रम प्रस्तुत गरिएको छ, जसले फिल्म सस्पेन्स र पारिवारिक भावनाको मिश्रण रहेको संकेत गर्छ।

शुभेन्द्र घोषको निर्देशनमा बनेको फिल्ममा प्रियंका कार्कीसँगै आर्यन सिग्देल, सरोज खनाल, गौरी मल्ल, प्रमोद अग्रहरी, ऋचा शर्मा, अनुपविक्रम शाही, सिम्रन खड्का र दीपाश्री निरौलालगायत कलाकारहरूको अभिनय रहेको छ।

आयंका फिल्म्सको ब्यानरमा निर्माण भएको फिल्मका निर्माता प्रियंका कार्की, क्याबिनेट श्रेष्ठ, आयुष्मान जोशी र प्रनित कार्की हुन्। कार्यकारी निर्माताको रूपमा सुरक्षा सिंह मलहोत्रा (प्रियंका कार्कीकी आमा) र सिमोस सुनुवार रहेका छन्।

फिल्मको कथा प्रियंका कार्की स्वयंले तयार पारेकी हुन् भने पटकथा शान बस्नेतले लेखेका छन्। संवाद लेखनमा प्रियंका र शान बस्नेतको सहकार्य रहेको छ। युवराज इन्दोरियाको छायांकन रहेको फिल्मलाई राजा सिंह सिदुले सम्पादन गरेका छन्।

फिल्म ‘मास्टर्नी’ आगामी भदौ ५ गतेदेखि देशभर प्रदर्शनमा आउने तयारीमा छ।