‘अञ्जिला’को दाबी : सिनेमाले व्यापक हान्यो, भन्यो- २ करोड ७ लाख कमाइयो

गत बिहीबार रिलिज भएको नेपाली चलचित्र ‘अञ्जिला’ को तीन दिनको ग्रस कलेक्सन सार्वजनिक गरिएको छ। निर्माताले आइतबार सार्वजनिक गरेको कलेक्सन रिपोर्टअनुसार, यो चलचित्रले बिहीबार, शुक्रबार, र शनिबार गरी २ करोड ७ लाख ग्रस कलेक्सन गरेको हो।

चलचित्रका निर्माता प्रेमकुमार श्रेष्ठ ले वितरकहरूबाट प्राप्त रिपोर्टका आधारमा कलेक्सन रिपोर्ट सार्वजनिक गरेको बताए।

रिलिजको पहिलो दिनदेखि नै यस चलचित्रले उल्लेख्य रूपमा दर्शकको साथ पाउँदै आएको छ। रिलिजको दिन फागु पूर्णिमा परेका कारण मध्य दिनदेखि शो सुरु भएता पनि दिउँसोदेखि भएका सम्पूर्ण शोहरू हाउसफुल भएका थिए। शुक्रबार पनि चलचित्रलाई दर्शकको राम्रो साथ प्राप्त भएको थियो। पहिलो शनिबार देशभरका सम्पूर्ण शोहरू हाउसफुल भई नयाँ शोहरू समेत थपिएको थियो, र थपिएका शोहरू समेत तुरुन्तै हाउसफुल भइरहेको निर्देशकले बताएका थिए।

चलचित्र ‘अञ्जिला’ ले आइतबार पनि राम्रो व्यापार गर्न सफल भएको वितरक करण श्रेष्ठ ले बताए। बिहानीका शोहरूमा केही कम दर्शक देखिएता पनि दिउँसो र साँझपखका प्रायः शोहरू हाउसफुल रहेको श्रेष्ठले बताए। आइतबार पनि चलचित्र युनिट दर्शकलाई भेट्न हल-हलमा पुगिरहेको छ।

‘अञ्जिला’ नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनीमा आधारित छ, जसमा एन्जिला आफैँले प्रमुख भूमिकामा अभिनय गरेकी छन्। यसमा उनको बाल्यकालदेखि खेल जीवनसम्मको संघर्ष र सफलताको भावुक कथा प्रस्तुत गरिएको छ। यस चलचित्रमा एन्जिलाको साथमा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय रहेको छ।

दर्शकहरूको सकारात्मक प्रतिक्रियासँगै ‘अञ्जिला’ को गीत ‘रात किन हुन्छ हजुर, रात किन हुन्छ’ सामाजिक सञ्जालमा भाइरल भएको छ। थानेश्वर गौतम र शान्तिश्री परियार को स्वरमा रहेको यो गीतको प्रभाव यति गहिरो बनेको छ कि दर्शकहरूले यससँग जोडिएका भावुक पोस्टहरू सेयर गरिरहेका छन्। टिकटक, फेसबुक, युट्युब लगायतका प्लेटफर्महरूमा यस गीतमा विभिन्न भिडियोहरू बनिरहेका छन्, जसले चलचित्रको लोकप्रियतालाई अझ बढाइरहेको छ। यो गीतमा प्रभा बर्तौलाको शब्द रचना रहेको छ भने थानेश्वरले नै सङ्गीत दिएका छन्।