उज्यालो नेपाल पार्टीद्वारा गायिका तथा चिकित्सक त्रिशला गुरुङ समानुपातिक उम्मेदवारमा सिफारिस

उज्यालो नेपाल पार्टीले आगामी प्रतिनिधि सभा निर्वाचनका लागि समानुपातिक प्रणाली अन्तर्गत चर्चित गायिका तथा चिकित्सक त्रिशला गुरुङलाई उम्मेदवारका रूपमा सिफारिस गरेको छ।

पार्टीका अनुसार स्वास्थ्य क्षेत्र सुधार, समावेशी राजनीति र पेशागत दक्षतालाई आधार मानेर गुरुङलाई समानुपातिक उम्मेदवारको सूचीमा अघि सारिएको हो।

हालको स्वास्थ्य प्रणालीमा असमान पहुँच, उपचार खर्चको तीव्र वृद्धि, ग्रामीण क्षेत्रमा स्वास्थ्य जनशक्तिको अभाव र स्वास्थ्य बजेटको प्रभावहीन कार्यान्वयन जस्ता चुनौती विद्यमान रहेको पार्टीको ठहर छ।

चिकित्सकीय अभ्यासबाट प्राप्त अनुभव र नीतिगत बुझाइका कारण गुरुङले संसदमा स्वास्थ्य क्षेत्रका यी समस्यामाथि व्यवहारिक तथा प्रमाणमा आधारित बहस अघि बढाउने विश्वास पार्टीले व्यक्त गरेको छ।

साथै, एक स्थापित गायिकाका रूपमा गुरुङले कला र संस्कृतिमार्फत सामाजिक चेतना अभिवृद्धि गर्दै आएकी छन्। स्वास्थ्य र सांस्कृतिक चेतनालाई जोड्ने उनको बहुआयामिक पहिचानले संसदमा फरक र प्रभावकारी प्रतिनिधित्व सुनिश्चित गर्ने उज्यालो नेपाल पार्टीको धारणा रहेको छ।

समानुपातिक उम्मेदवारका रूपमा सिफारिस भएसँगै गुरुङले “स्वास्थ्य सेवा नागरिकको मौलिक अधिकार हो” भन्ने मूल्यलाई केन्द्रमा राख्दै सुशासन, समावेशी नीति निर्माण र जनउत्तरदायी स्वास्थ्य प्रणालीका लागि संसदमा दृढ आवाज उठाउने प्रतिबद्धता व्यक्त गरेकी छन्।