0
Shares
चलचित्र विकास बोर्डले पछिल्लो शनिबारसम्मको आधिकारिक बक्सअफिस विवरण सार्वजनिक गरेको छ, जसले नेपाली फिल्महरूको कमाइ र दर्शक आकर्षणको स्पष्ट तस्वीर देखाएको छ ।
बोर्डको तथ्यांकअनुसार लालिमा ले ७ चैत शनिबारसम्म कुल ५ लाख २९ हजार ७३८ रुपैयाँ ग्रस कमाइ गरेको छ । मिराज रोशन निर्देशित यस फिल्मले सोही अवधिसम्म २ हजार ४० वटा टिकट बिक्री गरेको देखिन्छ ।
यौनकर्मी महिलाको संघर्ष र वेदनालाई कथावस्तु बनाइएको यो फिल्ममा रोश्नी अधिकारी ले शीर्ष भूमिका निर्वाह गरेकी छन् । सामाजिक विषयवस्तुमा आधारित भए पनि फिल्मले सीमित व्यापार गरेको देखिएको छ ।
त्यस्तै, आइतबार मात्र प्रदर्शनको ५१ दिन पूरा गरेको आबाट आमा ले शनिबारसम्म १३ करोड १० लाख ९२ हजार ७७५ रुपैयाँ ग्रस कलेक्सन गरेको छ । चन्द्र पन्त निर्देशित यस फिल्मलाई हालसम्म ५ लाख ३ हजार ११४ दर्शकले हेरेका छन् ।
यो फिल्मले स्थिर व्यापार गर्दै ५१ दिनसम्म उल्लेखनीय दर्शक आकर्षण कायम राख्न सफल भएको देखिन्छ ।
त्यस्तै, दिनेश राउत निर्देशित कुमारीको लाइफटाइम कलेक्सन ६६ लाख २५ हजार ४५१ रुपैयाँ ग्रस रहेको छ ।
अर्को फिल्म रमिताको पिरती को लाइफटाइम कलेक्सन ३० लाख ८४ हजार ८४३ रुपैयाँ ग्रस रहेको बोर्डको तथ्यांकमा उल्लेख छ ।
चलचित्र विकास बोर्डको यो रिपोर्टले हाल नेपाली फिल्म उद्योगमा केही फिल्मले दीर्घकालीन व्यापार गरिरहँदा केही फिल्मले अपेक्षाकृत कमजोर प्रदर्शन गरिरहेको स्पष्ट चित्र प्रस्तुत गरेको छ ।
