‘कमेडी दरबार ३’ सुरु: बैशाख ४ बाट प्रसारण, नयाँ जज र कमेडियन थपिए

लोकप्रिय हास्य टेलिभिजन शो ‘कमेडी दरबार’को तेस्रो सिजनको सुटिङ सुरु भएको छ। नयाँ वर्ष २०८३ को सुरुवातसँगै निर्माण टिमले काम अघि बढाएको हो भने कार्यक्रम आगामी बैशाख ४ गतेदेखि प्रसारणमा आउनेछ।

सोमबार पुतलीसडकस्थित स्टुडियोमा दुई एपिसोडको सुटिङ सम्पन्न गरिएको छ। पहिलो एपिसोडमा ‘मितज्यू’ फिल्मको टिमबाट दयाहाङ राई, सौगात मल्ल, शिशिर बाङ्देल र तेरिया मगर सहभागी थिए भने दोस्रो एपिसोडमा ‘पहाड’ फिल्मको टिम उपस्थित थियो।

पहिलो र दोस्रो सिजनको सफलतापछि तेस्रो सिजनमा केही नयाँ परिवर्तन गरिएको निर्माण पक्षले जनाएको छ। यसपटक सेट डिजाइनमा परिमार्जन गरिएको छ भने जज प्यानल पनि विस्तार गरिएको छ। यसअघि महाराजा र महारानी मात्र रहेकोमा अब अभिनेत्री दिया मास्के ‘रानी’को भूमिकामा थपिएकी छन्। गौरी मल्ल (महारानी) र मनोज गजुरेल (महाराजा) भने यथावत छन्।

यस सिजनमा नयाँ कमेडियनका रूपमा दिनेश काफ्ले, सन्तोष थापा र सुजन जिम्बा प्रवेश गरेका छन्। साथै, डाबर रेडपेस्ट शीर्ष प्रायोजकका रूपमा जोडिएको छ।

कार्यक्रम प्रत्येक शुक्रबार राति प्राइम टेलिभिजन र ‘ओएसआर रियालिटी’ युट्युबमार्फत प्रसारण हुनेछ। शोको निर्देशन श्रृद्धा प्रसाईं र बिक्की अगरवालले गर्दै आएका छन् भने होस्टिङमा बिक्कीसँगै सजिना खनाल देखिनेछिन्।

लेखनमा सरोज भण्डारी र विकास अर्याल रहेका छन्। यसअघिका लोकप्रिय कमेडियन कलाकारहरू—सीडी विजय अधिकारी, विश्वास तिम्सिना (बीटी कान्छा), सुन्दर खनाल, पवित्रा साँकी (मिस पबी), सुजाता श्रेष्ठ, पवन खतिवडा र विकास अर्याल—यस सिजनमा पनि यथावत रहनेछन्।