काठमाडौं, जेठ ०७ । द हिडन ट्रेजरले ‘मिस नेपाल २०२६’ का लागि आवेदन खुला गरेको छ । बुधबार पुल्चोकस्थित द प्लाजामा आयोजित पत्रकार सम्मेलनमार्फत आगामी संस्करणबारे विस्तृत जानकारी सार्वजनिक गरिएको हो ।

आयोजकले नेपालभित्र तथा विदेशमा बसोबास गरिरहेका इच्छुक नेपाली युवतीलाई प्रतियोगितामा सहभागी हुन आह्वान गरेको छ । आवेदन दिने अन्तिम मिति जेठ २५ (जुन ८) सम्म तोकिएको छ ।

प्रतियोगिताको ग्राण्ड फिनाले साउन १६ (अगस्ट १) मा पुल्चोकस्थित द प्लाजामै आयोजना हुने भएको छ । कार्यक्रम हिमालय टेलिभिजनमार्फत प्रत्यक्ष प्रसारण गरिने आयोजकले जनाएको छ ।

यस वर्ष ‘मिस नेपाल वर्ल्ड’, ‘मिस नेपाल कोस्मो’ र ‘मिस नेपाल इन्टरनेशनल’ गरी तीन मुख्य उपाधिका लागि विजेता छनोट गरिनेछ । प्रतियोगितामा सहभागी हुन न्यूनतम उचाइ ५ फिट ३ इन्च र उमेर १८ देखि २७ वर्षबीच हुनुपर्ने प्रावधान राखिएको छ ।

विदेशमा बसोबास गर्ने नेपालीले गृह मन्त्रालयद्वारा जारी एनआरएन कार्डका आधारमा पनि आवेदन दिन सक्ने व्यवस्था गरिएको छ । आवेदन प्रक्रिया निःशुल्क रहनेछ ।

आयोजकका अनुसार विराटनगर, इटहरी, बुटवल, पोखरा, नेपालगञ्ज र जनकपुरमा अडिसन सञ्चालन गरिनेछ । साथै काठमाडौंका १० वटा कलेजमा ‘मिस नेपाल एक्टिभेसन’ अभियान पनि सञ्चालन गरिनेछ ।

अन्तिम अडिसन जेठ २६ (जुन ९) मा काठमाडौंमा हुनेछ । छनोट भएका प्रतियोगीले ग्राण्ड फिनालेअघि आवश्यक प्रशिक्षण र व्यक्तित्व विकास सम्बन्धी तयारी प्राप्त गर्नेछन् ।

यस वर्ष प्रतियोगिताको संरचनामा केही परिवर्तन गरिएको छ । द हिडन ट्रेजरका निर्देशक द हिडन ट्रेजर का अनुसार अन्तिम ३० बाट प्रश्नोत्तर चरण हटाइएको छ भने अब केवल उत्कृष्ट ५ लाई मात्र प्रश्न सोधिनेछ ।

फिनालेमा मिस कोस्मोका प्रमुख कार्यकारी अधिकृतदेखि वर्तमान विजेता समेत काठमाडौं आउने आयोजकले जनाएको छ ।

द हिडन ट्रेजरले पछिल्ला वर्षमा अन्तर्राष्ट्रिय प्रतियोगितामा नेपाली प्रतिनिधिहरूले हासिल गरेका उपलब्धिबारे पनि जानकारी दिएको छ । वर्तमान मिस नेपाल वर्ल्ड लुना लुइँटेल ले ‘मिस वर्ल्ड २०२६’ मा नेपालको प्रतिनिधित्व गर्ने भएकी छन् । त्यस्तै मिस नेपाल इन्टरनेशनल २०२५ उरुषा भण्डारी ले टोकियोमा आयोजित ‘मिस इन्टरनेशनल’ मा सहभागिता जनाएकी थिइन् ।

मिस नेपाल अर्थ २०२५ सोनी घले ले फिलिपिन्समा आयोजित ‘मिस अर्थ’ को ट्यालेन्ट राउन्ड जितेकी थिइन् भने मिस नेपाल कोस्मो २०२५ दीपशिखा नेपाल ले भियतनाममा आयोजित ‘मिस कोस्मो’ मा नेपालको प्रतिनिधित्व गरेकी थिइन् ।

यस वर्षको प्रतियोगितामा कजारिया रमेश टाइल्स लिमिटेड मुख्य प्रायोजक र श्री नटराज ज्वेलर्स सह–प्रायोजकका रूपमा रहेका छन् । श्री नटराज ज्वेलर्स गत वर्षदेखि क्राउन पार्टनरका रूपमा पनि आबद्ध रहेको आयोजकले जनाएको छ ।

यस वर्षको ‘मिस नेपाल २०२६’ को थिम ‘टप अफ द वर्ल्ड’ राखिएको छ ।