काठमाडौं — आगामी भदौ १२ गतेदेखि प्रदर्शनमा आउने तयारीमा रहेको नेपाली फिल्म **‘पार्वती’**को डबिङ कार्य अन्तिम चरणमा पुगेको छ। फिल्मकी मुख्य अभिनेत्री दीपाश्री निरौलाले आफ्नो भागको डबिङ सम्पन्न गरेपछि फिल्मप्रति उत्साह व्यक्त गरेकी छन्।

डबिङपछि प्रतिक्रिया दिँदै दीपाश्रीले फिल्मको कथा आफूले अपेक्षा गरेभन्दा अझ प्रभावशाली बनेको बताइन्। फरक शैलीमा प्रस्तुत गरिएको कथावस्तु र मन छुने पटकथाले आफूलाई विशेष रूपमा प्रभावित गरेको उनको भनाइ छ।

फिल्मकी कथाकार तथा निर्देशक नीता ढुङ्गाना अधिकारीले पनि डबिङ प्रक्रियाप्रति खुसी व्यक्त गरेकी छन्। आफूले कल्पना गरेभन्दा राम्रो फिल्म तयार भइरहेको उल्लेख गर्दै उनले दीपाश्रीसहित सम्पूर्ण कलाकार तथा प्राविधिक टोलीप्रति आभार व्यक्त गरिन्।

‘नीता फिल्मस्’को ब्यानरमा निर्माण भएको फिल्ममा निर्देशक नीता ढुङ्गाना अधिकारीसँगै दीपाश्री निरौला, अशोक दर्जी, सिरु बिष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेलको मुख्य अभिनय रहेको छ।

हरिहर अधिकारी निर्माता रहेको फिल्मको पटकथा शिवम् अधिकारीले लेखेका हुन्। शंकर पाण्डे कार्यकारी निर्माता तथा प्रोडक्सन म्यानेजर हुन्। फिल्ममा सुदीप बरालको छायांकन, साहिल खानको सम्पादन र रोयल भिमसेनको पोस्टर डिजाइन रहेको छ।

यसअघि ‘नीता फिल्मस्’ले ‘ह्रस्वदीर्घ’ निर्माण गरेको थियो। ‘पार्वती’ भदौ १२ गतेदेखि देशभर प्रदर्शनमा आउने तयारीमा छ।