काठमाडौं । नेपाली फिल्म उद्योगमा अन्तर्राष्ट्रिय बजारलाई लक्षित गर्दै नयाँ फिल्म **‘बम्पर चिठ्ठा’**को औपचारिक निर्माण घोषणा गरिएको छ। स्याडो पिक्चर्सको ब्यानरमा निर्माण हुने फिल्मको थिम पोस्टर सार्वजनिक गर्दै निर्माण टिमले परियोजनाबारे जानकारी दिएको हो।

फिल्मको निर्देशन बिक्की महर्जनले गर्नेछन्। अमित अग्रहरि र निशा गुइदे निर्माता रहेको फिल्मले नेपाली मौलिक कथा, संस्कृति र समकालीन मनोरञ्जनलाई विश्व दर्शकमाझ पुर्‍याउने लक्ष्य राखेको निर्माण पक्षले जनाएको छ।

सार्वजनिक गरिएको थिम पोस्टरमा नेपालको सांस्कृतिक सम्पदा र रहस्यमय वातावरणको झल्को प्रस्तुत गरिएको छ। प्राचीन मन्दिरको शिखरबाट तलको चहलपहल नियालिरहेको दृश्यमार्फत कथाप्रति उत्सुकता जगाउने प्रयास गरिएको छ। पोस्टरले कथावस्तुबारे धेरै खुलासा नगरे पनि नेपाली समाज, संस्कृति र मानवीय सम्बन्धलाई रोचक शैलीमा प्रस्तुत गरिने संकेत दिएको छ।

निर्माण टिमका अनुसार ‘बम्पर चिठ्ठा’ नेपाली, हिन्दी, तेलुगु र फ्रेन्च गरी चार भाषामा निर्माण हुनेछ। प्रदर्शनपछि फिल्म अमेजन प्राइम भिडियोमार्फत विश्वव्यापी रूपमा रिलिज गरिने योजना रहेको छ। यसमार्फत फिल्म २४० भन्दा बढी देश र क्षेत्रमा रहेका दर्शकमाझ पुग्ने निर्माण पक्षको विश्वास छ।

फिल्मको कथा निर्देशक बिक्की महर्जन स्वयंले लेखेका हुन्। कलाकार तथा अन्य प्राविधिक टोलीबारे विस्तृत जानकारी भने आगामी चरणमा सार्वजनिक गरिने बताइएको छ।

यसैबीच, यही निर्माण टिमको अघिल्लो फिल्म ‘आउट ल’ आगामी सेप्टेम्बरमा अमेजन प्राइम भिडियोमार्फत विश्वव्यापी रूपमा रिलिज हुने तयारीमा छ। निर्माण टिमका अनुसार **‘आउट ल’**को प्रदर्शनपछि **‘बम्पर चिठ्ठा’**को निर्माण कार्यलाई तीव्रता दिइनेछ।

निर्माण पक्षले **‘बम्पर चिठ्ठा’**लाई केवल कमेडी फिल्मका रूपमा मात्र नभई नेपाली फिल्मलाई अन्तर्राष्ट्रिय बजारमा थप सशक्त रूपमा स्थापित गर्ने महत्वाकांक्षी परियोजनाका रूपमा प्रस्तुत गरेको छ।