भुटानी नेपाली समुदायको प्रेमकथामा आधारित ‘मनैमा सानुमाया’ गीतमा यस्ती छिन् मिरुना

काठमाडौं। भिजुअल आर्ट्स स्टुडियो र टौवा स्टुडियोको सहकार्यमा निर्माण गरिएको ‘मनैमा सानुमाया’ म्युजिक भिडियो सार्वजनिक भएको छ।

भुटानी नेपाली समुदायको सांस्कृतिक पृष्ठभूमिमा आधारित यो म्युजिक भिडियोले पहिचान, प्रेम, र संघर्षका गहिरा भावनाहरूलाई प्रभावकारी रूपमा प्रस्तुत गरेको छ।

‘मनैमा सानुमाया’ ले पहिचानको अभाव, प्रेम र करियरबीचको द्वन्द्व, तथा सामाजिक संघर्षलाई भावनात्मक रूपमा उजागर गर्दै भुटानी नेपाली समुदायको सांस्कृतिक महत्त्व र सामाजिक जटिलतालाई कलात्मक शैलीमा उजागर गर्ने प्रयास गरेको छ।

लेखक तथा निर्देशक विवेक रसाइलीले निर्देशन गरेको यस भिडियोमा मिरुना मगर, दीपक रसाइली, र प्रेम सुब्बाको अभिनय देख्न सकिन्छ।

मिरुना मगरले भुटानी नेपाली समुदायकी एक महिलाको भूमिका निर्वाह गरेकी छिन्। उनको पात्रले आफ्नो प्रेम र करियरबीचको संघर्षलाई जीवन्त रूपमा पर्दामा उतारेकी छिन्, जसले समाजमा पहिचान गुमाउनुको पीडा र व्यक्तिगत द्वन्द्वलाई प्रस्ट्याउँछ।

‘सानुमाया’ ले भुटानी नेपाली समुदायको सांस्कृतिक परम्परा, प्रेम र पहिचान गुमाउनुपर्ने परिस्थितिलाई गहिरो र भावनात्मक ढंगले चित्रण गरेको छ। म्युजिक भिडियोमा प्रस्तुत कथा र सांगीतिक संयोजनले दर्शकलाई पात्रहरूको भावनात्मक संसारमा डुब्न प्रेरित गर्छ।

विजय बस्याल कार्यकारी निर्माता रहेको यस भिडियोका रेजोन थापा मुख्य सहायक निर्देशक हुन् भने उज्ज्वल जोशीले छायांकन गरेका छन्।

‘सानुमाया’ भिजुअल आर्ट्स स्टुडियोको आधिकारिक युट्युब च्यानलमार्फत सार्वजनिक भएको छ। दर्शकहरूले यो सांगीतिक कथा हेरेर भुटानी नेपाली समुदायको संघर्ष, प्रेम, र पहिचान गुमाउनुको यथार्थलाई अनुभव गर्न सक्नेछन्।