वैशाख १२ मा आउने भयो हरिवंशको ‘भूठान’

‘बुलबुल’ फेम निर्देशक विनोद पौडेलको दोस्रो सिनेमा ‘भूठान’को प्रदर्शन मिति घोषणा भएको छ।

बिहीबार, म्याड मङ्की फिल्म्सले सिनेमाको पोस्टर सार्वजनिक गर्दै आगामी वर्षको वैशाख १२ गतेलाई प्रदर्शन मिति तय गरेको हो।

सिनेमाको अंग्रेजी शीर्षक ‘The World’s Happiest Man’ राखिएको छ, जसको अर्थ हुन्छ ‘संसारकै सबैभन्दा खुसी व्यक्ति’। पोस्टरमा मुख्य कलाकार हरिवंश आचार्यलाई प्रमुख भूमिकामा प्रस्तुत गरिएको छ। उनी निराश भावमा देखिएका छन्, सेतै फुलेको कपाल र दाह्रीसहित।

पोस्टरमा हलिउड अभिनेता ब्रुस डर्न र नेपाली अभिनेता दयाहाङ राईलाई पनि समेटिएको छ। दयाहाङ अमेरिकी सेनाको पोशाकमा प्रस्तुत भएका छन्। पोस्टरले पात्रहरूको लुक्स र भावनात्मक अवस्थालाई प्रस्ट पार्ने प्रयास गरेको छ।

सिनेमाको कथा र निर्देशन विनोद पौडेलले गरेका हुन्। कलाकारहरूको सूचीमा अनुराधा मजुमदार, पूजा चन्द, ऋचा घिमिरे, जोयस पाण्डे, अदिति प्याकुरेल, टम क्रेन, र विमल सुवेदीको नाम उल्लेख छ।

सिनेमामा हलिउडका केही प्राविधिकहरूको पनि संलग्नता छ। निर्माता सूचीमा विनोद पौडेल, अविरल थापा, राजेन्द्र ठकुराठी, अमिताभ जोशी, सशांक मैनाली, र कीर्तना बाँस्कोटा छन्। निर्देशक पौडेलका अनुसार सिनेमा विश्वव्यापी दर्शकलाई लक्षित गरेर बनाइएको छ, र जोसुकैले पनि यसको कथाको गहिराई महसुस गर्न सक्ने छन्।

निर्मातामध्ये एक, अविरल थापाका अनुसार, हरिवंश आचार्यको यस सिनेमामा अहिलेसम्म कहिल्यै नदेखिएको नयाँ अवतार र उत्कृष्ट अभिनय देख्न पाइनेछ। उनले ‘भूठान’लाई आचार्यको करियरकै कालजयी सिनेमा हुने विश्वास व्यक्त गरेका छन्।

सिनेमाले भुटानदेखि भारत, नेपाल हुँदै हाल अमेरिकामा बसोबास गरिरहेका भुटानीहरूको देशप्रेम, आफ्नो थातथलो छोड्नुपर्दाको पीडा, र आफ्नो जरा खोज्ने कथालाई समेटेको छ।

प्राविधिक टिममा सुसन प्रजापतिको छायांकन (DOP), अन्जय खड्काको सम्पादन, डिकेश खडगी शाहीको ध्वनि, सुर्य शाहीको कास्टिङ, विमल सुवेदीको प्रोडक्सन डिजाइन, र बलिउडका अञ्जन गजुरेलको कला निर्देशन रहेको छ।