0
Shares
फिल्म ‘१२ गाउँ २’ बनाउने चर्चा चलिरहेको बेला, नायक विराज भट्टले अर्को फिल्म साइन गरेका छन्। उनले ‘१२ गाउँ २’को काम केही समयका लागि पछि सार्दै नयाँ फिल्म ‘राम नाम सत्य’ साइन गरेका छन्।
सोमबार, फिल्मका निर्देशक माइकल चन्द र नायक विराज भट्ट बीच कागजी सम्झौता भएको छ। फिल्म ‘१२ गाउँ’को रिलिजपछि, विराजको चर्चा र क्रेज फेरि एकपटक चुलिएको छ, र उनलाई फिल्म अफरको लाइन लाग्न थालेको छ।
तर, विराजले आफ्नो होम प्रोडक्सनको फिल्मको काम रोक्दै ‘राम नाम सत्य’ साइन गरेको निर्णयलाई विशेष महत्व दिइएको छ। फिल्मको कथावस्तु र पटकथा निकै मन परेपछि, विराज यो फिल्ममा काम गर्न तयार भएका हुन्।
म्युजिक भिडियो निर्देशक माइकल चन्दले यो फिल्मको निर्देशन गर्न लागेका हुन् र फिल्मको कथा पनि उनकै रहेको छ। फिल्मको छायांकन आउँदो वर्षबाट सुरु गर्ने योजना रहेको छ।
फिल्ममा अर्जुन पोखरेल र बाबुल गिरीको संगीत हुनेछ भने उत्तम गुरुङ, उपेन्द्र शाही र स्वेता विमलीले लगानी गर्नेछन्। नरेन्द्र शाह र सन्तोष अर्याल फिल्मका कार्यकारी निर्माता हुन्।
यो फिल्म एक्सन, लभ स्टोरी र कमेडीको कथामा निर्माण गरिनेछ।
निर्देशक चन्दले दर्शकलाई केही फरक र विशेष देखाउनका लागि प्रि-प्रोडक्सनमा समय लगाएको बताएका छन्। नायक विराज भट्टले पनि यो फिल्ममा काम गर्न आफू उत्साहित रहेको बताएका छन्।
फिल्मका लागि अन्य कलाकारहरूको जानकारी क्रमशः निर्माण पक्षले सार्वजनिक गर्ने योजना बनाएको छ।
