‘परालको आगो’मा प्रकाश सपुत भए अनुबन्धित

कथाकार गुरुप्रसाद मैनालीको कृति ‘परालको आगो’मा आधारित रहेर निर्माण हुने सिनेमा ‘परालको आगो’मा कलाकार प्रकाश सपुत अनुबन्धित भएका छन्।

सिनेमा निर्माण कम्पनी हरिओम सिने मेकर्सका तर्फबाट निर्माता सुशील पोखरेलले प्रकाशलाई सिनेमामा अनुबन्ध गरेका हुन्।

मैनाली कथा पुरस्कार ट्रस्टले हरिओम सिने मेकर्सलाई सिनेमा निर्माणको मञ्जुरी दिइसकेको छ। ‘परालको आगो’ मैनालीको कथा संग्रह ‘नासो’मा संग्रहित छ।

निर्माता पोखरेलका अनुसार प्रकाश सिनेमाका प्रमुख दुई पात्रमध्ये एक हुन्। यसअघि प्रमुख कलाकारका रूपमा जितु नेपाल र सुहाना थापा अनुबन्धित भइसकेका छन्।

निर्माता पोखरेलका अनुसार चामे, गौँथली र जुठे दमाई वरिपरि घुम्ने कथामा जितु र प्रकाशको क्यारेक्टर चामे र जुठे दमाईमध्ये कुन भन्ने विषय अहिले सस्पेन्समै राखिएको छ।

सिनेमामा सुशील देवकोटाको लेखन, संकल्प भुजेलको छायांकन, रामजी लामिछानेको कोरियोग्राफी, सत्य–स्वरुपराज आचार्यको संगीत हुनेछ। सिनेमा निर्माण नियन्त्रण नगेन्द्र घिमिरेले सम्हाल्नेछन्।

निर्माता पोखरेलका अनुसार सिनेमा २०८२ मा प्रदर्शन हुनेछ। यसै नाममा ४५ वर्षअघि निर्देशक प्रताप सुब्बाले सिनेमा निर्माण गरेका थिए।

निर्माता पोखरेलले यसपटक लोकेसन, प्रस्तुतीकरण र पटकथालाई फरक किसिमले प्रस्तुत गर्न लागेको बताएका छन्। सिनेमामा निर्देशक लक्ष्मण सुनारको निर्देशन रहनेछ। कथामा ‘परालको आगो’ दुई पात्र चामे र गौँथलीको झैँ–झगडालाई प्रस्तुत गरेको छ।

निर्माता पोखरेलले यसअघि ‘मैदान’, ‘जीवनदाता’, ‘निगरानी’, ‘जय शिव शंकर’, ‘लभ सभ’, ‘राधे’ र ‘यात्रा’ जस्ता सिनेमा निर्माण गरिसकेका छन्।