‘बलिदान’मा सौगात मल्लको सशक्त अवतार, पोस्टर सार्वजनिक

 नेपाली फिल्म उद्योगमा व्यापक प्रतीक्षा गरिएको फिल्म बलिदान का लागि अभिनेता सौगात मल्लको लुक्स सार्वजनिक गरिएको छ। आगामी बडादसैँको फूलपातीको दिन प्रदर्शनमा आउने तयारीमा रहेको यस फिल्मका दुई पोस्टरमा अभिनेता मल्ल एक सशक्त र रहस्यमय अवतारमा देखिएका छन्।

एक पोस्टरमा मल्लको एउटा आँखा कालो रङको छ। उनले लामो दाह्री, केश र गाढा रङको वस्त्र धारण गरेका छन्। उनको हातमा एउटा बलिरहेको राँको देखिन्छ। पृष्ठभूमिमा अन्य मानिसहरूको समूह र आगोको ज्वालाहरू पनि देख्न सकिन्छ, जसले फिल्मको कथावस्तु द्वन्द्वात्मक प्रकृतिको रहेको जानकारी दिन्छ। अर्को पोस्टरमा अभिनेता मल्लले हातमा हतियार बोकेर लडाइँको परिवेशमा देखिएका छन्। निर्देशक सन्तोष सेनका अनुसार, बलिदान मा अभिनेता मल्लको बिल्कुलै फरक अवतार रहेको छ, जसको लागि उनले अधिक मेहनत गरेका छन्।

सौगात मल्ल नेपाली फिल्म क्षेत्रमा आफ्नो अभिनय कलाका लागि परिचित छन् र उनका हरेक नयाँ भूमिकालाई दर्शकले निकै चासोका साथ हेर्ने गर्छन्। बलिदान मा उनको यो फरक र शक्तिशाली गेटअपले दर्शकहरूलाई सिनेमा घरसम्म तान्न सफल हुने अपेक्षा गरिएको छ। बलिदान लाई चाडपर्वको माहोलमा दर्शकहरूका लागि उत्कृष्ट मनोरञ्जनको खुराकको रूपमा हेरिएको छ।

यसअघि बलिदान का प्रमुख अभिनेता समीर भट्टको जन्मदिनको अवसर पारेर प्रि-टिजर सार्वजनिक गरिएको थियो, जहाँ समीर देशभक्तिपूर्ण भावनाले ओतप्रोत संवाद र दमदार एक्सन दृश्यसहित देखिएका थिए। सो प्रि-टिजर नेपालसहित नेपालीहरूको बसोबास रहेका दर्जनभन्दा बढी देशहरूमा युट्युब ट्रेन्डिङमा आएको थियो।

आसुसेन फिल्म्स प्रा.लि.को प्रस्तुति रहेको यस फिल्ममा समीर भट्ट, सौगात मल्लसँगै अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायत कलाकारहरूको अभिनय रहेको छ। पवन ब्राडफोर्ड बिस्ट निर्माता तथा प्रेम पुरी कार्यकारी निर्माता रहेका छन्।