आयो साईग्रेस पोखरेलको पुस्तक ‘द स्टोरीटेलर’

चर्चित कथा वाचक साईग्रेस पोखरेलले आफ्नो कथा वाचन यात्रा र यस क्षेत्रमा हासिल गरेका उपलब्धिहरू समेटेर नयाँ पुस्तक ‘साईग्रेस: द स्टोरीटेलर’ सार्वजनिक गरेका छन्। यो विमोचन उनको १००औँ लाइभ प्रस्तुतिसँगै संयुक्त राज्य अमेरिकाको कोलोराडोमा सम्पन्न भएको हो।

पुस्तक विमोचन समारोहमा नेपाली सङ्गीत क्षेत्रका हस्ती एवं लेखक हिरण्य भोजपुरे, अमेरिकाका लागि नेपालका सद्भावना दूत विनोद अधिकारी, ग्लोबल नेपाल फिल्म अवार्ड अमेरिकाका अध्यक्ष नवराज श्रेष्ठ, ख्यातिप्राप्त सङ्गीतकार मनोजराज सिवाकोटी, र कोलोराडो कार्यक्रमका आयोजक सुमन केसी लगायत विशिष्ट व्यक्तित्वहरूको उपस्थिति थियो।

‘साईग्रेस: द स्टोरीटेलर’ पुस्तकले कथा वाचनको विश्वव्यापी इतिहासका साथै साईग्रेसका विश्वभरका प्रस्तुतिहरूका अविस्मरणीय क्षणहरूलाई प्रस्तुत गरेको छ। यसले उनका कथा वाचनले दर्शकहरूमा पारेको गहिरो प्रभावको पनि विश्लेषण गरेको छ। पुस्तकको प्रमुख आकर्षण उनका बहुचर्चित अडियो उपन्यास ‘मेरो अधुरो प्रेम’ हो, जुन युट्युबमा हालसम्म ६६ लाख पटक हेरिएको छ।

पुस्तकमा साईग्रेसले आफ्ना व्यक्तिगत अनुभव र आत्म-निरीक्षणहरू पनि समावेश गरेका छन्। उनले विभिन्न दर्शकहरूसँगको अन्तरक्रियाका मर्मस्पर्शी कथाहरू बाँडेका छन्, जसमा एक श्रोताले उनको कथा सुनेपछि आत्महत्याको विचार त्यागेर आशाको नयाँ किरण पाएको प्रसङ्ग पनि समावेश छ।

यस प्रकाशनमार्फत साईग्रेसले केवल आफू कथा वाचकको रूपमा कसरी परिपक्व हुँदै गए भन्ने देखाएका छैनन्, बरु जीवनलाई स्पर्श गर्ने र परिवर्तन ल्याउने कथा वाचनको शक्तिमा पनि बल दिएका छन्।