‘महाकाव्य’: नेपाली फिल्ममा एपिक फ्यान्टासीको नयाँ युग सुरु

फरक धारको कथा, विश्वस्तरीय भिजुअल इफेक्ट्स र दमदार एक्सनका साथ नेपाली फिल्म ‘महाकाव्य’ निर्माणको तयारीमा जुटिएको छ। खुसी फिल्म्सको ब्यानरमा निर्माण हुन लागेको यस फिल्मको हाल प्री-प्रोडक्सन कार्य तीव्र गतिमा अगाडि बढिरहेको निर्माण टिमले जनाएको छ।

फिल्मको निर्देशन मदन खड्काले गर्दैछन्, जो यसअघि थुप्रै चर्चित म्युजिक भिडियो निर्देशन गरिसकेका छन्। ‘महाकाव्य’ खड्काको डेब्यु फिल्म हुनेछ। एक्सन निर्देशनमा शुक्रराज शाह रहनेछन्। फिल्मको थिम पोस्टर सार्वजनिक गरिएको छ। थिम पोस्टरमा दुई ज्वालामुखी भालुहरूको टक्कर भएको दृश्य समावेश छ। यसले फिल्मले केही नयाँ दिने संकेत गर्छ। को होला त्यो आवाज, जसले महाकाव्य लेख्नेछ? फिल्ममा काम गर्ने प्रमुख कलाकारहरूको बारेमा अहिले खुलाइएको छैन।

‘महाकाव्य’ ले दर्शकलाई एउटा अद्भुत सिनेम्याटिक अनुभव दिने लक्ष्य राखेको छ। ऐतिहासिक, पौराणिक र आधुनिक फ्यान्टासीको संयोजनमा आधारित यो फिल्म नेपाली फिल्म इतिहासमै नयाँ युगको सुरुवात हुने मानिएको छ।

फिल्ममा मुख्य भूमिकामा एक नयाँ कलाकारलाई प्रस्तुत गरिँदैछ। निर्माण टिमका अनुसार, उक्त कलाकारले शारीरिक रूपमा परिवर्तन गर्नुका साथै एक्सन र नृत्यमा गहिरो तालिमसमेत लिएका छन्। हाल उनी अन्तिम तयारीमा छन्। फिल्मको छायांकन भदौदेखि सुरु हुने तयारी छ। निर्माता शान्ती मगरको लगानीमा निर्माण हुने ‘महाकाव्य’ महादेवको शक्ति, एक अनुपम प्रेमकथा र रहस्यमय साहसिक यात्राको माध्यमबाट नेपाली पौराणिक कथाहरूलाई पुनर्जीवित गर्न खोजिएको कथा हो। फिल्मले नेपाली संस्कृति, मिथक, र हराउँदै गएका पवित्र स्थलहरूको कथा भिजुअल माध्यमबाट गहिरो रूपमा प्रस्तुत गर्ने उद्देश्य राखेको छ।