‘प्रतिवैरम’ को आइटम नम्बरमा प्रियंका , कति लिइन् पारिश्रमिक ?

रोशन दासको निर्देशनमा निर्माण भइरहेको फिल्म ‘प्रतिवैरम’ को आइटम गीतको छायांकन सम्पन्न गरिएको छ।

मधेशको कथामा आधारित यस फिल्मको गीत चलचित्र विकास कम्पनीको भव्य सेटमा दुई दिनसम्म खिचिएको हो।

कोरियोग्राफर सुरेन बसेलका अनुसार, आइटम गीतमा अभिनेत्री प्रियंका कार्कीलाई फिचर गरिएको छ।

यस आइटम नम्बरका लागि प्रियंकालाई निर्माताले महँगो रकम खर्च गरेको बताइन्छ । श्रोतका अनुसार उनले पारिश्रमिक वापत २ लाख लिएकी छन् ।

अब प्रियंकाका लागि खर्च गरिएको रकम फिल्मका लागि कति फाइदाजनक हुनेछ, त्यो भने गीत रिलिजपछि थाहा हुनेछ ।

यसैगरी फिल्मका निर्देशक दासले फिल्ममा मधेशको वास्तविक सौन्दर्य देखिने दाबी गरेका छन् ।

, “मधेशबारे बन्ने धेरै फिल्महरूमा न त वास्तविक सौन्दर्य देखिन्छ, न त गहिरो समस्या। ‘प्रतिवैरम’ मार्फत त्यो अभाव हटाउने प्रयास गरेका छौं।”, दासले भने

उनका अनुसार, फिल्म मधेश केन्द्रित सामाजिक र राजनीतिक विषयवस्तुसँगै दाजु-बहिनीको भावनात्मक कथामा आधारित हुनेछ।

फिल्म रेज इन्टरटेनमेन्टको प्रस्तुति हो, जसलाई किङ्स वाईटी स्टुडियो र श्रीयन इन्टरटेनमेन्टसँगको सहकार्यमा निर्माण गरिँदैछ। फिल्मको कथा स्वयं निर्देशक दासले लेखेका हुन् भने पटकथा युवराज भट्टराईले लेखेका हुन्।

फिल्ममा सम्राट दास, प्रियंका कार्की, रमेश बुढाथोकी, नविन श्रेष्ठ, आलिशा बास्तोला, बिरेन्द्र कुशवाह, सुप्रज्ञा शर्मा, रोशन, नारायण बिक, रोनी यादव, कमल सुनार, गीता श्री, अग्नि सुवेदी लगायतका कलाकारको मुख्य भूमिका रहेको छ।

आइटम गीतमा संगीत मनिष अधिकारी, शब्द रोशन दास, र स्वर रितिका श्रेष्ठको रहेको छ भने छायांकन नितेश घतानले गरेका छन्।

निर्देशक दासका अनुसार, फिल्मको आधा भन्दा बढी छायांकन सम्पन्न भइसकेको छ, र बाँकी छायांकन बर्खा सकिएपछि गरिनेछ।