कमेडी, हरर र सस्पेन्स सहितको ‘चिट्ठी’ भाद्र २० देखि देशव्यापी प्रदर्शन हुँदै

 एरा प्रोडक्सनको व्यानरमा संचारकर्मी कमला जोशी निर्माता रहेको चलचित्र चिट्ठीको आधिकारिक ट्रेलर ओएसआर डिजिटल युट्युब च्यानलमार्फत सार्वजनिक गरिएको छ। कमेडी, हरर र सस्पेन्सको मिश्रणमा बनेको यो चलचित्र आउँदो भाद्र २० गतेदेखि देशव्यापी प्रदर्शनमा आउने भएको छ। चलचित्रलाई कुबेर डिष्ट्रिब्युसनले वितरण गर्नेछ।

निर्देशक माधव राज खरेलको लेखन तथा निर्देशनमा तयार भएको चलचित्रमा अर्गानिक कमेडियनको रूपमा चर्चा कमाएका खड्ग बहादुर पुन ‘खबपु’, संजीत भण्डारी, गोपाल ढकाल ‘छन्दे’, नवराज थापा, प्रबण भुषाल, मुस्कान लामा, कञ्चन चालिसे, मोहन निरौला, शान्तिप्रिय, श्रीदेव भट्टराई, नम्रता खरेल, राजन थापा, रश्मी भट्ट, मुना निरौला, कविन्द्र त्रिपाठी, पुरुषोत्तम सानु, सोमा खत्री, प्रल्हाद खरेल, डेभिल सिंह राजपुत, समिर लामा, राजु कार्की र रज्जु गुरुङ लगायतका कलाकारहरूको अभिनय रहेको छ।

कमेडी–हरर र सस्पेन्सको मिश्रणमा प्रस्तुत गरिएको यस चलचित्रमा सामाजिक सन्देशलाई मनोरञ्जनसँगै पस्कने प्रयास गरिएको निर्माण पक्षले जनाएको छ।

यसअघि टुटेको तारा र सिन्दुरको रङ गीतहरु सार्वजनिक भइसकेका छन् भने ट्रेलरले दर्शकमाझ थप उत्सुकता जगाएको छ। निर्माण पक्षको विश्वास छ कि चिट्ठीमा कलाकारहरूको दमदार अभिनय, मौलिक कथा र आकर्षक प्रस्तुति रहेको छ।