0
Shares
नेपालको सिनेपाः बक्सअफिसमा हालै रिलिज भएका नेपाली फिल्महरूले उत्साहजनक व्यापार गरिरहेका छन्।
ओम प्रतीक निर्देशित फिल्म ‘मोहर’ ले प्रदर्शनको २६ दिनसम्ममा ४ करोड ९२ लाख रुपैयाँ ग्रस कमाइ गरेको छ। आगामी सप्ताहन्तसम्म फिल्मले ५ करोडको आँकडा पार गर्ने अनुमान गरिएको छ।
१ करोड ८६ लाख रुपैयाँ बजेटमा निर्माण भएको यो फिल्मले लगानी सुरक्षित गर्दै कलाकार पल शाह, नीति शाह र निर्देशक प्रतीकलाई राहत दिएको छ। बेनिशा हमालको पनि यो फिल्ममा उल्लेखनीय उपस्थिति रहेको छ।
सुदूरपश्चिमको देउकी प्रथामा आधारित सामाजिक कथावस्तुमा बनेको फिल्मको प्रचारप्रसारमा कलाकार टोली अझै सक्रिय छ।
त्यस्तै, केदार घिमिरेको पहिलो लिड रोल रहेको फिल्म ‘माग्ने राजा’ ले पनि बक्सअफिसमा सुखद व्यापार गरिरहेको छ। १२ दिनमा ४ करोड ९ लाख रुपैयाँ ग्रस कमाइ गर्दै फिल्मले तीजको छेकोमा राम्रो प्रदर्शन गरेको छ।
अर्कोतर्फ, विजय बराल अभिनीत ‘जनै हराएको मान्छे’ ले अपेक्षाअनुसारको व्यापार गर्न नसकेको देखिएको छ। १२ दिनमा १ करोड १० लाख रुपैयाँ ग्रस कमाइ गर्दै फिल्मले प्रतिस्पर्धात्मक रिलिजको कारण कमजोर प्रदर्शन गरेको अनुमान गरिएको छ।
हाल देशभर १६५ हलहरू रियल टाइम बक्सअफिस प्रणालीमा जडान भइसकेका छन्, जसले नेपाली फिल्म उद्योगलाई पारदर्शिता र विश्लेषणमा सहयोग पुर्याइरहेको छ।
