0
Shares
सिजल एण्ड सिस्टर फाउण्डेशनले यस असोजमा गएको बाढी र पहिरोबाट प्रभावित अति विपन्न परिवारलाई राहत प्रदान गरेको छ।
शनिबार, बलेफी, भोटेकोशी, जुगल, र सुनकोशी गाउँपालिकाका बाढीपीडितलाई लक्षित गर्दै फाउण्डेशनले जाडोबाट बच्न हरेक परिवारलाई एउटा ब्ल्याङ्केट र मृतक परिवारलाई जनही १०,००० रुपैयाँ प्रदान गरेको थियो। साथै, अति विपन्न परिवारलाई थप आर्थिक सहयोग गरिएको छ।
राहत वितरण कार्यक्रममा सिजल एण्ड सिस्टरका सल्लाहकार एवं पत्रकार राजेन्द्र लुइँटेल, गीतकार गीता अधिकारी, गायक पुष्कर सुनार, गायिका तथा अभिनेत्री सारिका घिमिरे, अभिनेता श्रीदेव भट्टराई, भारोत्तोलन विजेता जीवन गिरी, निर्देशक कुबेर तमाङ, क्यामेराम्यान नवीन सुनुवार, र संस्थाका सचिव डिल्लीराम सिग्देल लगायतको उपस्थिति थियो।
त्यसैगरी, संस्थाले संयोजक राजन भण्डारीको नेतृत्वमा पनौती-१२ का अति विपन्न तथा बाढीपीडित परिवारलाई ३०० भन्दा बढी बाल्टिन, पानी फिल्टर, र अन्य सामग्री वितरण गरेको थियो। यो वितरण कम्युनिटी इनोभेसन अर्गनाइजेसनलगायत अन्य संस्थासँगको सहकार्यमा सम्पन्न भयो।
फाउण्डेशनका अध्यक्ष सञ्जित भण्डारीले विभिन्न संस्थाबीचको सहकार्यले समाजसेवाका कार्यहरूलाई अझ प्रभावकारी बनाएको बताउनुभयो। संयोजक सदिक्षा सुवेदीले कार्यक्रमलाई लक्षित समूहका लागि अत्यन्तै प्रभावकारी र बृहत बनाइएको बताउनुभयो।
फाउण्डेशनको स्थापनाकर्ता मेघ सुवेदीले यसअघि रोसी गाउँपालिकाका बाढीपीडितहरूलाई २५० भन्दा बढी ब्ल्याङ्केट, मृतकका परिवारलाई १०,००० रुपैयाँ, र घर पूर्ण रूपमा क्षति भएकालाई ५०,००० रुपैयाँ सहयोग प्रदान गर्नुभएको थियो।
संस्थाले नेपालका विभिन्न जिल्लामा विपन्न समुदाय र पीडितहरूलाई सहायता गर्दै आएको छ। यसमा मेलम्ची बाढीपीडितलाई तत्काल राहत, जाजरकोट भूकम्पपीडितलाई आर्थिक सहयोग, र भुटानी शरणार्थी शिविरमा खाद्यान्न वितरणजस्ता कार्यक्रमहरू समावेश छन्।
सिजल एण्ड सिस्टर फाउण्डेशन अमेरिकामा पनि सक्रिय छ, जहाँ मेघ सुवेदीसँगै पञ्चम तामाङ, योगेश नेपाल, र सुकवीर तमाङलगायतले नेतृत्व गरिरहेका छन्। संस्थाले आगामी दिनमा थप ठूला सामाजिक कल्याणका योजनाहरू कार्यान्वयन गर्ने लक्ष्य राखेको छ।
