‘श्री बुकुरो’ ट्रेलर : कालभन्दा अघि केही खोजीरहेकी आमाको कथा

काठमाडौं । महाशिवरात्रिको अवसर पारेर फागुन १ गतेदेखि प्रदर्शनमा आउन लागेको नेपाली फिल्म ‘श्री बुकुरो : द होम कलिङ’ को मर्मस्पर्शी ट्रेलर सार्वजनिक गरिएको छ। ग्रामीण परिवेशमा आधारित पारिवारिक कथावस्तु प्रस्तुत गर्ने फिल्मले ट्रेलरमार्फत नै दर्शकमाझ भावनात्मक जोड स्थापित गर्न खोजेको देखिन्छ।

करिब ३ मिनेट ३३ सेकेन्ड लामो ट्रेलर काव्यात्मक न्यारेसन शैलीमा तयार गरिएको छ, जसले पात्रहरूको चाहना, अपेक्षा र आन्तरिक द्वन्द्वलाई संवेदनशील ढंगले प्रस्तुत गर्छ। ट्रेलरमा मुख्य पात्र लक्ष्मी गिरी को वरिपरि कथा घुम्छ — सानो घर (बुकुरो) बनाउने सपना, छोराहरूको विवाह र उनीहरूको खुसी हेर्ने आमाको चाहनाले कथा अघि बढेको संकेत मिल्छ।

मानवीय सम्बन्धका सूक्ष्म भाव र पारिवारिक नोकझोंक समेटिएको ट्रेलरले फिल्मलाई विशुद्ध पारिवारिक तथा मनोरञ्जनात्मक प्रस्तुति का रूपमा स्थापित गरेको छ।

फिल्मको लेखन तथा निर्देशन सुदीप भुपाल सिंह ले गरेका हुन्। करिब ९ वर्षपछि निर्देशनमा फर्किएका सिंहले यसअघि ‘माला’ र ‘रुद्रप्रिया’ निर्देशन गरेका थिए। पछिल्लो समय सामाजिक–पारिवारिक फिल्मप्रति दर्शकको आकर्षण बढिरहेका बेला ‘श्री बुकुरो’ पनि त्यही धारमा सफल हुने विश्वास निर्माण टिमको छ।

फिल्म रेञ्ज को ब्यानरमा निर्माण भएको यस फिल्ममा आशीर्वाद क्षेत्री, लक्ष्मी गिरी, निकिता आचार्य, प्रतिकराज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मी भट्ट, उत्तम केसी, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मा लगायतका कलाकारको अभिनय रहेको छ। फिल्मकी निर्माता रुबी सेन सिंह हुन्।

प्राविधिक टिमतर्फ सुरज तामाङ र प्रवीण सिंहको कोरियोग्राफी, आईड्रिम एनिमेसनको भिएफएक्स, मनोरञ्जन श्रेष्ठको कलर ग्रेडिङ, बनिष शाह, चन्दन दत्त र परिच्छेद सेनको सम्पादन तथा सञ्जय लामा र राजेश श्रेष्ठको छायांकन रहेको छ। फिल्मको छायांकन मुस्ताङ, बाग्लुङ, कास्की, दमौली, मकवानपुर र काठमाडौं मा गरिएको हो।

फिल्मका गीतमा रञ्जीत गजमेर, बसन्त सापकोटा र विक्रम कार्की को संगीत तथा शिव परियार, विशेष पौडेल, युक्ति बिमली, सविन सुवेदी र सन्देश पौडेल को स्वर सुन्न पाइनेछ।

अब ट्रेलरपछि फिल्मले हलमा कस्तो प्रतिक्रिया पाउँछ भन्ने कुराले ‘श्री बुकुरो’ को यात्रालाई दिशा दिनेछ।