युरोपियन लिग खेल्न जान लागेकी एञ्जिलालाई ‘अञ्जिला’ निर्माण टिमले गर्‍यो बिदाइ

‘अञ्जिला’ सिनेमाकी प्रमुख अभिनेत्री तथा नेपाली राष्ट्रिय महिला फुटबल टिमकी कप्तान एवं गोलरक्षक एञ्जिला तुम्बापो सुब्बालाई सिनेमा निर्माण पक्षले ग्रिसका लागि बिदाइ गरेको छ ।

एञ्जिला ग्रिसको ए डिभिजन क्लब नीस एट्रोमिटोउमा खेल्न त्यता जाँदैछिन् ।

बुधबार काठमाडौंमा आयोजित पत्रकार सम्मेलनमा उनलाई २०२४/२५ सिजनका लागि अनुबन्ध गरिएको जानकारी दिइयो । यसका साथै उनलाई विशेष सम्मानसहित बिदाइसमेत गरियो ।

कार्यक्रममा प्रतिनिधि सभा सदस्य सुहाङ नेम्बाङ, नेपालकी पहिलो महिला फुटबल टिमकी कप्तान रमा सिंह, राष्ट्रिय पुरुष फुटबल टिमका कप्तान किरण चेम्जोङ, र फुटबल खेलाडी सङ्घका अध्यक्ष विक्रम लामालगायत नेपाली खेलकुद क्षेत्रका विशिष्ट व्यक्तिहरू उपस्थित थिए ।

त्यसैगरी सो पत्रकार सम्मेलनमा सिनेमाको मङ्सिर २३, २०८१ (डिसेम्बर ८) मा हङकङमा वर्ल्ड प्रिमियर गरिने जानकारी दिइयो ।

प्रिमियरमा निर्देशक मिलन चाम्स र एञ्जिला सुब्बा सहभागी हुनेछन् ।

हङकङमा एक हप्तामै टिकट सोल्ड आउट भएको जानकारी दिदैं निर्देशक चाम्सले दर्शकहरूको चासो र उत्साहप्रति आभार व्यक्त गरे ।

‘हङकङमा टिकट बिक्री एक हप्तामै सोल्ड आउट हुनु, यो सिनेमाप्रतिको उत्साहलाई देखाउँछ । ‘अञ्जिला’ले नेपाली सिनेमा र खेलकुदलाई नयाँ उचाइमा पुर्‍याउने विश्वास छ,’ चाम्सले भने ।

हङकङ पछि जनवरी १८, २०२५ मा अस्ट्रेलियामा, जनवरीको अन्त्यतिर जापानमा, फेब्रुअरी १५ मा युके र मार्च २ मा कोरियामा समेत प्रिमियर गर्ने तालिका रहेको छ।

सिनेमा फागुन २९ गतेदेखि नेपालसँगै विश्वभर सिनेमा एकसाथ सार्वजनिक प्रदर्शनमा आउने जानकारी सो कार्यक्रम दिइएको छ ।

कार्यक्रममा बोल्दै प्रतिनिधि सभा सदस्य सुहाङ नेम्बाङले एञ्जिलाको सङ्घर्ष र सफलता नेपाली खेलकुद र सिनेमाको लागि प्रेरणादायी भएको बताए ।

‘यो सिनेमाले नेपाली महिला खेलकुदको महत्त्व र सम्भावनालाई विश्वसामु पुर्‍याउनेछ । निर्देशक मिलन चाम्स नेपाली सिनेमाको ‘मेस्सी’ हुनुहुन्छ । प्रतिभाशाली युवाहरूलाई थप उचाइमा पुर्‍याउन यो सिनेमाले ठूलो भूमिका खेल्नेछ’, उनले भने ।

त्यसैगरी नेपाली महिला फुटबल टिमकी प्रथम कप्तान रमा सिंहले सिनेमालाई ऐतिहासिक प्रयासको रूपमा विश्लेषण गरिन् ।

‘सम्भवतः यो सिनेमा नेपाली महिला खेलाडीको जीवनमा आधारित पहिलो बायोपिक हो । एञ्जिलाको सङ्घर्ष र सफलताको कथा खेलकुद पर्यटनको विकासका लागि पनि प्रेरणा बन्नेछ’, सिंहले भनिन् ।

यस्तै राष्ट्रिय पुरुष फुटबल टिमका कप्तान किरण चेम्जोङले सिनेमालाई नेपाली फुटबलको ऐतिहासिक उपलब्धि भएको उल्लेख गरे ।

उनले भने, ‘नेपाली फुटबलको पहिलो बायोपिक बनेको सुन्दा गर्व लागेको छ । आशा छ, यो सिनेमाले थप प्रेरणादायी प्रभाव छोड्नेछ।’

यस्तै ‘अञ्जिला’की मुख्य अभिनेत्री एञ्जिलाले पहिलो पटक युरोपमा खेल्ने अवसर पाएकोमा अत्यन्तै खुसी रहेको बताइन् ।

‘अञ्जिला’ सिनेमा कप्तान एञ्जिला सुब्बाको जीवन सङ्घर्ष र सफलतामा आधारित छ ।

उनले शीर्षक भूमिकामा आफैं अभिनय गरेकी छन् । उनका अलावा सिनेमामा सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, मञ्जु श्रेष्ठ र बुद्धि तामाङको अभिनय रहेको छ ।

सिनेमाका निर्माता प्रेम कुमार श्रेष्ठ हुन् भने सह-निर्माताहरूमा टुबेन्द्र लिम्बु, विनोद अग्रवाल र राजेश बगडिया छन् । सुदीप बरालको छायाँकन रहेको सिनेमामा सम्पादन मिलन श्रेष्ठको रहेको छ ।

कार्यक्रममा निर्देशक चाम्सले ‘अञ्जिला’मा एञ्जिलाको जीवन कथा रहेता पनि पूर्ण बायोपिक भने नभएको बताए ।

यसैगरी निर्माता श्रेष्ठले यस सिनेमाको व्यापारबाट प्राप्त रकमबाट एञ्जिलाको लागि काठमाडौंमा घर तयार गरिने बताए ।

सो घरलाई फुटबल एकेडेमीको रूपमा परिणत गरी सङ्घर्षमा रहेका फुटबल खेल्न चाहनेलाई युवतीहरूलाई सहयोग गर्ने योजना एञ्जिलाको रहेको छ ।