0
Shares
कथाकार गुरुप्रसाद मैनाली लिखित ‘परालको आगो’ कथामा सिनेमा निर्माण हुने भएको छ ।
मैनाली कथा पुरस्कार ट्रस्टले हरिओम सिने मेकर्स निर्माता कम्पनीलाई निर्माणको मञ्जुरी दिएसँगै सिनेमा निर्माण पक्का भएको हो ।
‘परालको आगो’ मैनालीकृत ‘नासो’ कथासंग्रह संग्रहित छ ।
निर्माता सुशील पोखरेललाई कथाकार मैनालीका छोरा माधवप्रसाद मैनालीले ‘कथाको मर्म नबिग्रने गरी’ निर्माणको अनुमति दिएका हुन् ।
निर्माता पोखरेलका अनुसार सिनेमा आगामी वर्षको दशैंमा रिलिज हुनेछ ।
४५ वर्षअघि निर्देशक प्रताप सुब्बाले यही कथामाथि सिनेमा निर्माण गरेका थिए। सो सिनेमा श्यामश्वेतमा खिचिएको थियो ।
निर्माता पोखरेलले यसपटक लोकेसन, प्रस्तुतीकरण र पटकथालाई फरक किसिमले सिनेमामा प्रस्तुत गर्न लागेको बताए ।
लक्ष्मण सुनार निर्देशक रहेको सिनेमा फागुनदेखि छायांकनमा जानेछ ।
निर्माण पक्षले हाल कलाकार छनौटको चरणमा आफूहरु रहेको जनाएको छ ।
‘परालको आगो’कथाले जोइपोई चामे र गौँथलीको घरझगडा र मेलमिलापको कथा पेस गर्छ।
सिनेमामा सुशील देबकोटा लेखन सुरेन्द्र रानाको शब्द सत्यस्वरुपको संगीत तथा रामजी लामिछानेको कोरियोग्राफी रहनेछ । नरेन्द्र घिमिरे निर्माण नियन्त्रका रुपमा रहनेछन् ।
निर्माता पोखरेलले यसअघि ‘मैदान’, ‘जीवनदाता’, ‘निगरानी’, ‘जय शिव शंकर’, ‘लभ सभ’, ‘राधे’ र ‘यात्रा’ लगायतका सिनेमाहरु निर्माण गरेका थिए।
