चलचित्र ‘कुमारी’को पहिलो गीत सार्वजनिक, माघ २३ बाट प्रदर्शन हुने

निर्देशक दिनेश राउतको नयाँ प्रेम कथानक नेपाली चलचित्र कुमारी ले आफ्नो पहिलो अफिसियल गीत कता छौ मेरो फूल सार्वजनिक गरेको छ। निर्माण टिमले यससँगै चलचित्रको रिलिज मिति माघ २३ गते तोकेको छ। रिलिज मिति ‘भ्यालेन्टाइन डे’ नजिक परेकाले फिल्मले विशेषगरी युवा दर्शकलाई लक्ष्य बनाएको देखिन्छ।

यसअघि टुँडिखेलमा आयोजना गरिएको कार्यक्रममा गीतको लाइभ प्रस्तुति दिइएको थियो, जसले सोसल मिडियामा ठूलो चर्चा पायो। गीत गायक केहर सिंह लिम्बु र उनका ब्यान्ड केहर एन्ड द लुङ्गा द्वारा प्रस्तुत गरिएको हो र युट्युब तथा टिकटकमा ‘जेन-जेड’ पुस्तामाझ लोकप्रिय बन्दैछ।

चलचित्रमा मुख्य भूमिकामा अबिषेक खड्का र आकृति राजभण्डारी छन्, जसले यसै फिल्ममार्फत डेब्यु गर्दैछन्। साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनीषा शर्मा पनि फिल्ममा देखिनेछन्।

निर्देशक राउतले आइ एम सरी बाट आफ्नो निर्देशन यात्रा सुरु गरेका हुन् र नोभेम्बर रेन तथा क्लासिक जस्ता सफल प्रेमकथाका लागि परिचित छन्। पछिल्ला वर्षमा सामाजिक विषयमा आधारित फिल्म बनाइरहेका राउतले दर्शकको रुचिअनुसार प्रेमकथामा फर्किएको बताए।

कुमारीमा चार गीत रहनेछन्। सबै गीतमा स्वर केहर सिंह लिम्बुले दिएका छन्। संगीतमा सुमन तामाङ र प्रशान्त शिवाकोटीको पनि सहभागिता छ। गीतका शब्द सागर लामिछाने मगर, सुमन तामाङ र युवराज काफ्लेले लेखेका छन्।

फिल्म बिनिश इन्टरटेन्मेन्ट र पिक्चर फ्रेमको सहकार्यमा निर्माण भएको हो। निर्माता महेन्द्र अधिकारी, कार्यकारी निर्माता केदार भुसाल, स्क्रिप्ट विकास सुवेदी, छायांकन निर्देशन सुसन प्रजापति, सम्पादन सुप्रिम पराजुली, रंग संयोजन सुप्रिम पराजुली, साउन्ड डिजाइन उत्तम न्यौपाने, कोरियोग्राफी किरण थापा र शिशिर खाती, प्रोडक्सन डिजाइन आशिका शर्मा र कस्ट्युम डिजाइन अञ्जली रिजाल रहेका छन्।

फिल्मको डिजिटल वितरण मोशन पिक्चर्सले गर्दैछ भने काठमाडौं उपत्यकामा डीसीएन र उपत्यका बाहिर कुवेर सिने डिस्ट्रीब्युशनले थिएट्रिकल वितरण गर्नेछ।